【YAS 醒目旅行貼士】冇執輸!執喼技巧大公開

醒目旅行貼士 執喼 行李清單 旅遊

係咪每次出門諗起要執喼就頭痛呢?仲要去到當地先發現總有嘢帶漏~要嬲住出遊好唔抵。

想做個醒目旅人,執齊嘢其實好易,只要記住以下要訣:

1. 買機票先 Check 護照
曾經唔記得帶護照出門嘅舉手!要避免咁醜怪嘅事情再發生,要記住前一日就放定護照入袋!去到機場先發現護照過期亦大有人在,買機票前記住順便睇一睇啦。

2. 用腦演習
記得帶化妝品就要帶埋卸妝液,帶出街衫就要帶埋瞓覺衫~執嘢嗰陣嘗試喺腦中想像一次玩完一日返到酒店你會做咩就會記得㗎啦。

執喼 衣物 天氣 旅行

3. 留意濕度
記得留意當地天氣,尤其係濕度!歐美等地天氣特別乾燥,皮膚唔容易適應,護膚品陣容一定要同香港唔同。

4. 善用 Memo 紙
旅行插蘇、叉電器/線、外置充電器等都好容易唔記得帶,貼張memo 紙喺門口或者電話底提自己就唔會唔記得啦。

5. 帶住私伙去旅行
你會唔會瞓唔慣酒店嘅床,要帶私伙公仔或者枕頭袋先瞓得著呢?有啲習慣就係改唔到。同樣,帶漏嘢都係習慣。建議將每次旅行唔記得帶嘅用品寫低一個清單,每次執喼都開出嚟睇一次,咁就萬無一失啦~

其實坊間有不少執行李App方便不時出Trip嘅朋友,包保唔會執行李執到頭都大晒。行李執好,仲要買定旅遊保險,咁就安全妥當ready to go!